Guwahati-ah electric bus tlan tir

Assam chief minister Sar­bananda Sonowal chuan Thawhṭanni khan Assam State Transport Corporation hnuaia electric bus tlan tir hmasak ber tur, bus 15-te chu a vai liam. 

Assam sorkar chuan an state chu boruak bawlhhlawh laka fihlima siam tura a hmalakna kawng khat atan electric bus tlan tir hi a tum a ni. Electric bus-te hi  'Faster Adoption and Manufacturing of Electric Vehi­cles' (FAME-1) scheme hnuai­ah lak an ni a, a enchhinna atan Guwahati-a Panbazar leh Kamakhya Temple inkara tlan tir phawt a ni ang. 

CM chuan electric bus a vai liamnaah, prime minister Narendra Modi hmathlir a lo neihte tihpuitlinna turin, Assam sorkar chuan Assam chu pollution free state-a siam turin hma a la mek a ni, a ti. Electric bus an enchhin tur chu a hlawhtling nia an ngaih chuan, state chhung hmun hrang hrangah pawh a tahtawlin tlan tir vek tum a ni, tiin a sawi. 

Sonowal chuan Guwahati chu South East Asia ramte luhka berah siam an tum tih sawiin, hemi tihhlawhtling tur hian  state mipui tinte thawhpuina an ma­mawh hle tih a sawi bawk. Minister of Transport Chandra Mohan Patowary pawhin an state chu pollution laka fihlima siam tur chuan mipuite an thawhho ṭhat a ngaih thu a sawi. Sorkar laipui chuan nikum khan FAME scheme hi a hawng a, Assam chu he scheme kalpui hmasakna tur state panga thlanchhuah zingah a tel a ni, a ti. FAME-2 scheme hnuaiah electric bus hi 100 neih belh leh tum a ni bawk a, heng zinga 50 chu Guwahati-ah tlan tirin, Jorhat leh Silchar-ah 25 ve ve tlantir tum an ni.

Minister chuan electric bus-te chu  hmanraw ṭha tak nena thuam an ni, gas hlauhawm engmah a tichhuak ve dawn lo a ni, a ti. Transport department chuan Assam-a electric bus siamna hmun din turin Hungary-a company chu thawhpui turin inremna a ziahpui thuai dawn tih a sawi bawk.