Hmarchhak mipuiten CAB an pawm ngai lo ang : AASU

All Assam Students' Union (AASU) chuan Thawhṭanni khan state pumah Citizenship (Amendment) Bill (CAB) duh lohna lantirin, he bill hi Assam leh hmarchhak state mipuite chuan an pawm ngai dawn lo tih an sawi. 

AASU hian kawng hrang hranga nawrh hi an huaihawt a, hmun ṭhen­khatah kawngzawh huaihawt a nih laiin ṭhenkhatah sit-in protest te neih a nih thung. CAB chu sorkar laipuiin Bangladeshi mite vote leina hmanrua atana a hman mai tur nia sawiin, hmarchhakah chuan hman luih an remti ngai dawn lo tih an sawi a ni. 

CAB dodalna hi hmarchhak state hrang hrangah lantir a lo ni fo tawh. Hmachhak state-a zirlai pawl hrang hrangte intelkhawmna, North East Students' Organisation (NESO) pawhin November 18 hian hmarchhak state pasarih khawpuiah ṭheuh CAB duh lohna lantirin nawrh huaihawt an tum bawk. 

AASU hruaitu Dipanka Kumar Nath leh Lurinjyoti Gogoi chuan CAB chu Assam Accord palzutna mai a ni lo a, India Danpui kalh a ni, an ti. Assam leh hmarchhak state dang mipuite puihna nen, he bill hi hmarchhak bial hrang hrangah dodalna lantir chhunzawm zel a ni dawn tih an sawi.