Manipur : ANSAM-in Manipur University-a ST/SC cell thuam chak ngen

Manipur-a All Naga Students’ Association, Manipur (ANSAM) chuan Manipur University Vice-Chancellor chu tribal zirlaite nghawng thei thil eng emaw zat, hun rei tak aṭanga la chinfel lohte ngaihven turin an ngen. University-a ST/SC Cell kalpui dan, postgraduate admission leh state hill district-a exam centre awm lohnate ngai pawimawh turin an ngen a ni.

Nilainia memorandum an theh luhah, Naga zirlai pawl chuan zirlaite hamṭhatna leh zirna lama hmasawnna tura tlakchhamna lian thamte an tarlang a, tribal scholar la theite hamṭhatna humhim turin a rang lama institution insiamṭhat an phut bawk. ANSAM chuan an thil phut zinga an ngaih pawimawh ber chu university-a Scheduled Tribe/Scheduled Caste (ST/SC) Cell dinhmun a nih thu sawiin, University Grants Commission (UGC) kaihhruaina angin cell chu din ni mah se, mumal taka hman a ni lo tih an tarlang.

ANSAM chuan university chu mumal taka he cell hi kalpui a nih theihna atan hma la turin an ngen a, hei hian zirlai admission leh hnathawk lakna kawngah a pui dawn a, zirlaite hamṭhatna leh staff tan reserve category a venghim dawn tih an sawi. Common University Entrance Test (CUET) kaltlanga postgraduate zirlaite admit-na tur thutlukna siam chuan hill district-a hmun hla leh tlawh pawh harsaa chengten exam tura hun rei tak zin veivahna atan an hman ṭhin avangin harsatna a siamsak tih an sawi.