Nagaland : Meningococcal disease alert tichhuak

Nagaland Health and Family Welfare department chuan mipa naupang kum 14 mi in meningococcal natna nia rinhlelh a vei tih hriat chhuah a nih hnuah, sikul, hostel leh zirna inah fimkhur tura hriattirna, advisory a tichhuak. Thuneitute chu he natna laka fimkhur tur leh, a vei nia rinhlelhte a rang lama report turin an hriattir.

August 3-a official advisory an tihchhuahah, mipa naupang hi August 2 khan CIHSR Hospital-a Paediatric Intensive Care Unit (PISU)-ah dah a ni tih tarlangin, naupang hian luak, thisen sang, hriatna chak lo leh taksa peng che ṭha thei lo a nei nia tarlan a ni.A taksaah vual neiin, tunah hian a dinhmun a ṭhat loh avangin mechanical ventilation leh life-support dang hmanga enkawl mek a ni. Meningococcal natna a vei nia rinhlelh a ni a, a result kimchang nghah mek a ni.

Health department chuan meningococcal hi natna hluar lo tak ni mah se, chenna in inhnaih leh hostel bakah dormitory-ahte muangchangin a inkaidarh theih tih an sawi. Hei vang hian a rang lama hriat chhuah leh enkawlna pek hma a pawimawh tih an tarlang bawk.

Meningococcal hi bacterium Neisseria meningitidis vanga awm niin, thluak leh spinal cord a khawih bakah septicaemia a thlen thei a, thisem zamah infection a siam thei bawk. He natna hi enkawl ran a nih loh chuan nunna atan a pawi thei a; khuh, ei leh in bungbel inṭawm, tui bottle leh meizial inzuk ṭawm hmangten a kai theih a ni. Health department chuan zirlai, zirtirtu, hostel warden leh healthcare worker-te chu fimkhur tura chahin; khawsik, luna, luak, khaw eng hmuh harsa, luhai leh hriatna chak lo, kaih emaw taksaa vual a awm chuan report vat turin an hriattir a ni.