Arunachal : CM-in China mi state-a lut an awm nia sawi hnawl

Arunachal Pradesh chief minister Pema Khandu chuan nimin Zirtawpni khan, China mi leh sa an state chhunga lut an awm nia report chu hnawlin, tualchhung mite leh Indian Army-te nena inbiakna hmangin he thil hi finfiah a ni dawn tih a sawi.

State khawpui Itanagar-a thuthar lakhawmtute a kawmnaah, Khandu chuan China People's Liberation Army (PLA)-te Line of Actual Control (LAC)-ah hmuh an ni tih sawi a awm chungchangah thu belhchian dawl zawk a la khawm dawn tih a sawi. Helai hmunah hian Indian Army dah an nih avangin China mi an luh a rin loh thu a sawi a, tualchhung mite nen inbiakna an neih tur thu leh, sipaite pawh a be dawn tih a tarlang.

Thla hmasa khan home minister Mama Natung chuan state chhungah China mi an lut nia sawi chu thudik lo, belhchian dawl lo leh phuahchawp a ni tih a lo sawi tawh bawk. Natung chuan state chhungah China mi an luh loh thu leh, ramri humhim turin India sipaiten theihtawp an chhuah chhunzawm zel tih a sawi. Social media-a thu dik lo thehdarhte awih lo turin mipui a chah.