Manipur : IMFL bottle 519 man

Manipur-a police leh security force-te chuan, Democratic Students’ Alliance of Manipur (DESAM) puihnain, August 5 khan state puma zu do beihpui an thlaknaah, Indian Made Foreign Liquor (IMFL) bottle 519 an man a, hemi kaihhnawihah hian mi eng emaw zat an man bawk.

He beihpui thlakna hi Imphal International Airport-ah neih niin, police-te chuan DESAM aṭanga an thudawn bawhzuiin, heng IMFL bottle 519-te hi Delhi aṭanga rawn ṭum IndiGo flight aṭangin an man a ni. Heng zute hi bungrua 90-ah a hranga dah an ni. He thil kaihhnawihah hian police-te chuan mi 15 an man a, an zingah hian mipa paruk leh hmeichhia pakua an tel. Zu leh a kengtu nia hriat mante hi Singjamei Police Station-ah hruai an ni.

Police-te chuan zu brand hrang hrang an man zingah Jack Daniel, Jameson Whiskey, Johnnie Walker, Glenlivet, Glenfiddich, Monkey Shoulder, Glenmorangie, Black Label, Absolut Vodka, Smirnoff, Jacob’s Creek Wine leh a dang eng emaw zat a tel tih an sawi. Beihpui thlakna dang an neihah, police-te chuan Kakching district-a Waikhong Police Station hnuai Aihang huam chhunga Thongjao Mamang Leikai-ah Leimapokpam Olin Meitei (34) chu manin, a kut aṭang hian DIC liquor litre 290 leh Maruti Alto (MN03P-5884) an man.

Imphal West-a Patsoi Police Station hnuai Khumbong Bazar-a Patsoi Lamkhai-a zu do beihpui an thlaknaah, police-te chuan DIC liquor litre 310 an man bawk. Security force-te chuan Bishnupur district-a Nambol Police Station hnuai Nambol huam chhungah DIC liquor litre 98 an man bawk. Police-te chuan he beihpui thlakna hi dan loa state chhunga zu thawn luh leh, zawrh chhuah tihtawpna tura hmalakna a kalpui mek zinga mi a nih thu an sawi.