Manipur : National Highway hawn tur thu puang

Manipur-a pawl hrang hrangin National Highway-te an dan aṭanga kum khat chuang liam hnuah, state sorkar chuan Inrinni liam ta, August 8 khan state-a hnam hrang hrangte zalen taka an veivah theihna turin National Highway-te a rang lama hawn a ni dawn tih a puang.

Sorkar thuchhuah avang hian Naga pawl, Tangkhul Naga Long chuan lawmawm an tih thu an sawi. Naga-te chenna hmuna sipai dah titawp turin an ngen nghal a, Naga-te chenna hmuna Kuki inrelbawlna hran siam an duh loh thu an sawi bawk.

Sorkar chuan Manipur khawpui Imphal leh Nagaland khawpui Kohima inkarah bus service kalpui ṭan leh a nih tur thu a puang bawk. Kum 2023 May thla aṭanga Kuki-Zo leh Meitei inkara buaina a chhuah hnuah khawtlang mipuite chu he highway-ah hian veivah khap a ni a, kumin February thla aṭang khan Kuki-Zo leh Naga inkarah buaina a chhuak leh bawk. National Highway hi Kuki leh Naga-te dan a ni a, NH-2 leh NH-202 section ṭhenkhat an dang bawk a ni.

National Highway-te hawn a nih leh tur thu hi chief minister, Yumnam Khemchand Singh, deputy chief minister Nemcha Kipgen leh Saitu MLA Haokholet Kipgen-te chuan Kangpokpi an tlawh ṭumin an puang a ni. He thu hi civil society pawl 14-in total shutdown puan an tum tih an sawi hnuah tihchhuah a ni. CM Singh chuan community hrang hrangte chu Manipur mi an ni tih an inpawm a ṭul a, hei hian zalenna leh inremna siam dawn tih a sawi.