Meghalaya NGO-ten ILP phutin Nawrh huaihawt dawn

Meghalaya state-a Inner Line Permit (ILP) system hman phutin NGO te chuan February 4 aṭangin ni nga awh nawrh huaihawt leh an tum. 

State chhunga NGO 12-te telna, Confederaton of Meghala­ya Social Organisations (CoMSO) chuan nawrh hi huai­hawt a tum a ni. CoMSO chuan chief minister Conrad Sangma leh union home minister Amit Shah-te meeting chuan an state-ah ILP hman a nih dawn leh dawn loh chungchang chiang takin engmah an sawifel lo tih an sawi. Shah chuan CM hnenah hian Delhi assembly inthlan neih zawh hnuah thutlukna siam a ni dawn chauh tih a lo hrilh a, hei vang hian NGO-te hi an lungawi lo a ni. 

CoMSO chairman Rober­tjune Kharjahrin chuan sit-in protest hi chawhnu dar 2 aṭanga tlai dar 5 inkar chhung, Feb­ruary 4-8 chhung nitin neih a ni ṭhin dawn tih a sawi. State Legislative Assembly-in an state-a ILP system hman a nih theih nana sorkar laipui nawrna tura resolution a pass chu thla hnih a liam leh tawh tih sawiin, Kharjahrin chuan sorkar laipuiin tun thlengin engmah a la tiamsak thei chuang lo a ni, a ti. Central-a BJP kaihhruai sorkar chuan Meghalaya state leh a leilung fate venhimna tur chu a ngaihven tak tak lo nia a ngaih thu a sawi bawk. 

Central minister-ten an state an tlawh hunah pawh CoMSO member-te chuan lungawi lohna lantir zel an tum tih a sawi. Hemi rual hian an state-a ram dang mi lutte venna leh dapchhuahna kawngah state thuneitute chu an thawhpui zel dawn tih a sawi.