Tuilian tuar ṭanpuina tura YouTuber-te sum hmuh chhuah endik dawn : Assam CM

Assam chief minister Himanta Biswa Sarma chuan state sorkarin state chhung leh pawn lam aṭanga YouTuber 72-ten tuilian tuar ṭanpuina tur sum an hmuh chhuahte endik a ni dawn tih nimin khan a sawi. An channel kaltlanga ṭanpuina sum an hmuhte hian Assam-a thlen leh thlen loh bakah, pawisa hman dan pawh endik a ni dawn tih a sawi.

CM Sarma chuan tuilian tuar ṭanpuina tura content creator-te leh mi tam tak hmalakna chu sorkarin a fak tih a sawi. Hemi rual hian chhawmdawl hna thawh kawnga thil felhlel a awm lohna tur leh, dik takin sum tlingkhawmte hman a ni em tih ngaih pawimawh a ṭul tih a sawi. YouTuber-ten sum an hmuh chhuah chu state-a ṭanpuina hnathawhna atan hman a nih leh loh finfiah a ni dawn tih a sawi a ni.

Assam-a YouTuber-te leh grassroot relief worker, Samay Gogoi-te hmalakna chu fakin, Chief Minister chuan fund chu khawi aṭanga hmuh chhuah nge tih leh, sum hmannate sorkarin chipchiar zawkin a chhui chiang dawn a ni, a ti. Mi tam takin sum an thawh khawm a, heng sumte hi khawiah nge hman a nih tih uluk taka endik a ṭul tih a sawi. Sarma chuan sorkarin YouTuber leh mi hrang hrangin chhawmdawlna atana sum an thawh chu hnam dan angin gamosa hmanga chawimawi a tum tih sawiin, mahse account-te chu finfiah hmasak a ngai dawn tih a tarlang. Assam Police Cyber ​​Cell chuan sum thawhkhawmna kaihhnawih account-te an thlithlai tih a sawi bawk.