Manipur : Cabinet-in Senapati medical college din pawm

Manipur cabinet chuan August 11 khan healthcare, infiamna, transport, media leh state legislature kalpui dan tura ruahmanna hrang hrang siamte a pawm. Mantripukhri-a Civil Secretariat-a cabinet meeting kaihruaitu, chief minister Yumnam Khemchand Singh chuan sawi hona an neihah, mipuite hamṭhatna tur ngaih pawimawh a nih thu a tarlang.

Meeting zawha Facebook-a thuchhuah a siamah, CM Singh chuan langtlang, rintlak leh mipui ngai pawimawh thei ang ber tura thutlukna a siam a ni tih sawiin, cabinet thutluknate chu state mipuite tana hamṭhatna thlentu a ni dawn a ni, a ti. Senapati-a Government Medica College din chu ngaih pawimawh ber niin, he college din thar turah hian MBBS zirlai 100 an awm thei dawn a, district hospital awm sa chu medical college din theihna tura thuam chak a ni dawn tih a sawi bawk.

Cabinet chuan kum 2020 February 1 aṭanga kum 2025, December 31 chhunga lirthei fitness certificate renew tihkhawtlai avanga hremna, ni khata Rs 50 ni ṭhin chu Rs 10-ah a tihhniam a ni. Hei bakah infiammite tan Asian Games leh Commonwealth Games-a Manipur hminga medal late leh telte sum pek an remti bawk. Commonwealth Games-a tel gold late chu Rs nuai 20 pek an ni dawn a, silver late chu Rs nuai 15, bronze late tan Rs nuai 10 leh a telte Rs nuai 4 pek an ni ang. Rate siamṭhat hian state khua leh tui, 2026 Commonwealth Games Glasgow-a telte pawh a huam dawn a ni.