Nagaland : CM-in FCRA siamṭhat tum ngaihtuah nawn turin Amit Shah ngen

Nagaland chief minister Neiphiu Rio chuan union home minister Amit Shah chu Foreign Contribution (Regulation) Act (FCRA) siamṭhatna tura rawtna chu ngaihtuah nawn leh turin a ngen a, he dan thlak danglamna hian kohhran leh Kristian charitable organization-te tan phurrit a thlen thei a, state chhunga zirna, healthcare leh social welfare programme-te a nghawng thei a ni, a ti.

August 10-a Amit Shah hnena lehkha a thawnah, CM Rio chuan FCRA Amendment Bill, 2026 chu parliamentary committee-ah uluk taka zirchiang turin a rawt a, a kaihhnawih stakeholder aiawhte an ngaihdan sawina hun pek a phut bawk. Rio chuan hetianga kalpui a nih chuan thil ṭha zawk a chhuak thei dawn a, hlauhthawnna a tihbo dawn bakah, mipuiin sorkarah rinna an nghat ngam dawn a, langtlang leh rintlak bakah community hrang hrang dikna chanvo a humhim dawn tih a sawi.

FCRA Amendment Bill hi kumin March 25 khan Lok Sabha-ah pharh a ni. Rio chuan khawtlanga section hrang hrang, a bik Kristian pawlte chu he dan thlak danglam tumna avang hian an lungawi loh thu a sawi. Nagaland Baptist Church Council (NBCC) leh, Bishop of Kohima pawhin Union Home Minister hnenah an lungawi loh thu an thlen tawh a, kohhran leh a kaihhnawih organisation-ten harsatna an tawhte tarlan a ni bawk.