Nagaland : Zirlai pawlin zirna inte I-Day hmang lo turin ngen

Naga Students’ Federation (NSF) leh, Ao Kaketshir Mungdang (AKM) chuan, an thuneihna hnuaia sikulte leh educational institution-te chu August 15-a Independence Day programme-ah zirlaite kal tir lo turin an hriattir a, he thil hi official function-a Vande Mataram version siamṭhat play emaw sak emaw ngei ngei tura tih a nih vang a ni.

August 12-a thuchhuah an siamah, NSF chuan an federating unit leh subordinate body-te chu official function neih chhunga Vande Mataram siamṭhat play emaw, sak emaw tura thupek tihchhuah chu hnuhkir ​​a nih hma chuan sikul leh educational institution-te chu Independence Day programme-a zirlaite tel tir lo turin an hriattir. NSF chuan Independence Day hman, hnam puanzar, National Anthem leh hnam chhinchhiahna dangte zahna lantir chu an dodal lo tih sawiin,Vande Mataram sak ngei ngei tura thupek tihchhuah erawh an pawm lo tih an sawi.

NSF chuan kumin January 28 khan Ministry of Home Affairs-ah he thu hi an lo thlen tawh tih an sawi. Federation chuan zirlai, Vande Mataram saknaa tel duh lote chungah eng hremna mah lekkawh tur a ni lo tih an sawi bawk. NSF-in thuchhuah a siam hnu hian AKM chuan Mokokchung district-a an thuneihna huam chhunga sikul leh zirna in hrang hrang hnenah thupek a tichhuak ta a ni.