Manipur : CRPF-in Jiribam-Imphal kawngah venhimna thuam chak

Central Reserve Police Force (CRPF) chuan Jiribam-Imphal kawng dunga bungraw pawimawh phur motor-te himna tur thuam chakin, bungraw phur truck 424 leh fuel tanker-te venghimtu tur security a dah belh. Heng bungraw phur lirtheite hi Jiribam aṭanga Imphal pan tur an ni a, truck 400 leh fuel tanker 24 an awm a ni. CRPF chuan venhimna khauh zawkin an kalpui a ni.

He thil hi August 11-a Jiribam aṭanga bungraw phur lirthei 381-ten, Ningani tlaia him taka Imphal an thlen hnua kalpui a ni. Security dah belh a nih chhan hi kawnga hun rei tak buaina an tawh avanga transporter leh driver-te nawrna vang a ni. Jiribam-a tang mek driver pakhat a thih hnuah, Transporters’ and Drivers’ Council (TDC) chuan state sorkar hnenah he an buaina hi chinfel sak tura ngenna an thawn tawh bawk.

Council chuan thuneituten lirthei tangkhangte tlan chhuah tur an nih loh chuan, transporter-te chuan truck batch 500 chu official security venhimna ni loa tlan chhuah tir an tum tih an tarlang. TDC president Hijam Ranjit chuan venhimna huang zauh chu lawmawm a tih thu sawiin, mahse an buaina chu venhimna hmang chauha chinfel theih a nih loh thu a sawi. NH-37-a kawng chhiate chu National Highways and Infrastructure Development Corporation Limited (NHIDCL) chuan a rang lama siamṭhat hna thawk tura hriattir turin state sorkar a ngen a ni.