Sikkim : Rualbanlo ṭhalaite tan hospitality-a hnathawh tur siam tum

Sikkim-a pianphunga rualbanlo ṭhalaite tan hospitality sector-a hna an thawh theihna tura hmalaknaah, state sorkar chuan industry-a hna an thawh theihna tura zirtirna pek leh practical framework siam turin hma a la. State Tourism and Civil Aviation Department (TCAD) chuan tunhnai khan "Sikkim INSPIRES" project hnuaiah pilot programme kalpui turin stakeholder meeting an nei a ni.

Meeting-ah hian IHM (Institute of Hotel Management) Bhubaneswar, IHM Gangtok, Composite Regional Centre (CRC) Sikkim, Women, Child, Senior Citizen leh Divyangjan (WCSC&D) Department leh Hospitality industry aiawhte an tel a ni. Official-te chuan he programme hi state-a an kalpui hmasakna ber a nih thu an sawi.

TCAD additional director, Tenzing Gelay Bhutia chuan he hmalakna hian hospitality sector tana rualbanlote theihna leh thiamna tihpuna tur roadmap siam a tum thu a sawi. Industry chu lainatna leh mihring hlutna ngaih pawimawhnaa innghat a nih thu sawiin, stakeholder zawng zawngte chu thawhhona ṭha neih a phut bawk. Technical Support Agency (TSA), TCAD official, Tamay Das chuan Sikkim INSPIRES project pholangin, thla li chhung awh tur pilot batch-ah Divyangjan candidate 20-25 training a pe dawn tih a sawi a ni.

Assam Lingzey-a Tribal Research Institute chu training neihna hmun tura thlan a ni a, helai hmunah hian infrastructure ṭha tawk tak a awm nia sawi a ni. Programme-ah hian technical training, hnathawk thei tura thiamna pekte telin, candidate-te chu an theihna leh tuina ang training pek an ni ang.