Arunachal: Assam Rifle camp bei

Arunachal Pradesh-a Changlang district-a Assam Rifle camp chu nimin, Zirtawpni khan helpawl nia rinhlelhten an bei a, he thil thleng vang hian security-te nen nasa takin silaiin an inkap a ni. He inbeihna hi Longvi khuaa 21 Assam Rifle-a Longvi Company Operating base (COB)-ah zing kar dar 3.15 vela thleng a ni a, security force zingah thi leh hliam an awm lo nia report a ni.

He inbeihnaah hian helpawl zinga mi thi leh hliam an awm leh awm loh hriat a ni lo. Silaia an inkah chhung hi minute 15 aṭanga minute 20 vel a ni a, helpawl nia rinhlelhte hi insasengin, ramhnuai lamah an tlanchhia tih security thuchhuah chuan a tarlang. He inbeihna hi NSCN (K-YA)-a colonel Makam Hachen kaihhruai nia sawi a ni a, mahse tun thlengin tute an nih hriat a la ni lo.

He inbeihna thlen hnu hian Assam Rifles sipaite leh Arunachal Pradesh police-te chuan an chhehvel ramngawah pawikhawihtute zawn beihpui an thlak nghal a ni. Report ziah a nih lai hian helpawl tlanchhiate hi zawn chhunzawm zel an ni. Security-te chuan Assam leh Arunachal Pradesh inrina, a bikin Tinsukia district-a Margherita, Ledo, Lekhapani leh Jagun-ahte zawn beihpui an thlak nasa zual a ni. International state ramri luhka bakah, naka checking leh patrol-te chu helpawl emaw, state-a luh ruk tum an awm leh awm loh uluk taka thlithlai tura tih an ni.