State hmasawnna thlen theihna atan remna leh muanna a awm a ṭul : Manipur CM

Manipur chief minister Yumnam Khemchand Singh chuan August 15, Independence Day-a thu a sawiah, state-a hmasawnna a thlen theihna turin inrintawnna, remna leh muanna bakah community hrang hrangin thawh hona ṭha an neih a pawimawh thu a sawi.

Independence Day vawi 80-na puala state khawpui, Imphal-a First Manipur Rifles Ground-ah hnam puanzar pawt pharhin, CM Khemchand chuan sorkar laipuiin state-ah dan leh thupek dinhmun siamṭhat tumin theihtawpin hma a la tih a sawi a, remna leh muanna ngelnghet siam leh turin community hrang hrang aiawhte nen inbiakna an nei mek tih a tarlang. State-a hmasawnna awm tur chuan remna leh muanna a awm a pawimawh tih a sawi bawk.

Remna leh muanna ngelnghet awm tur chuan hnam hrang hrang inkarah inrintawkna leh inhmangaih tawnna a awm a ṭul tih sawiin, chutih rualin tharum thawhna thleng ṭhin chuan remna leh muanna siam kawngah harsatna nasa tak a thlen ṭhin a ni, a ti. CM Khemchand chuan Zirtawpnia Kangpokpi district-a Langka Naga khuaa inbeihna thlenga mi pahnih an thihna chu nasa taka demin, he inbeihnaa pawikhawihtute chu man an ni dawn tih a sawi.

Chief Minister chuan state pumah hmasawnna hna thawh mek a nih thu leh, a kaihhruai sorkarin a ngaih pawimawh berte tarlangin, chung zingah chuan ṭhalaite tana hun remchang ṭha zawk siam, hmeichhiate thuam chak, loneitute leh entrepreneur-te puihbawmna pek leh state cultural heritage humhalhte an tel thu a sawi a ni.