Ramchhunga state ṭhang duang ber 3-na Meghalaya a ni: Meghalaya CM

Meghalaya chief minister Conrad K. Sangma chuan August 15 khan, state economy chu kum 2018 aṭang khan a let hnihin a pung tawh tih sawiin, kum nga liam taa ramchhunga state ṭhang duang ber pathumna an nih thu leh, a kaihhruai sorkar chuan sector hrang hranga hmasawnna a awm theihna turin hma a la zel dawn tih a sawi.

Independence Day lawmna puala Polo Grounds-a thu a sawiah, CM Sangma chuan a kaihhruai sorkar chuan hmasawnna kawngah thil ngaih pawimawh pathum an neih thu sawiin, chungte chu ram venhim leh humhalh, mipui thuam chak leh hnam ziarang chawikante an ni, a ti. Kum riat liam taa an dinhmun ngaihtuahin, tunah chuan state-ah sector hrang hrangah hmasawnna hmuh tur a awm tawh avangin lawmawm a tih thu a sawi. Sangma chuan kum 2018-a Chief Minister a nih aṭangin kawng leh infrastructure, loneih, healthcare, zirna, tourism leh infiamna lamah hmasawnna nasa tak a awm tih a sawi bawk.

Sangma chuan tun dinhmunah kum 2018 aṭang khan economy chu a let hniha a pun thu leh, state chu ramchhunga ṭhang duang ber zinga pathumna an nih phak thu a sawi a, prime minister Narendra Modi leh sorkar laipui thlawpna an dawn chhunzawm zel avangin lawmthu a sawi. Meghalaya hian 39th National Games thleng turin a inbuatsaih mek a, sorkar chuan infiamna lamah investment a kalpui chho ṭan bawk. Grassroot sports project 20,000 chuang zawhfel a ni tawh a, STAR programme chuan infiammi 2,400 a enkawl mek tih CM Sangma chuan a sawi.