Manipur : Imphal East leh Bishnupur-ah IDP awm zat tlahniam

Manipur-a Imphal East leh Bishnupur district-a relief camp-a Internally displaced persons (IDP) chhungkua awm zat chu thuneituten an chenna in leh loa an kir leh theihna tur leh an khawsak dinhmun siamṭha tura hmalak a nih avangin thla eng emaw zat chhung khan an tlahniam tawh.

Official-te chuan August 16-a thuchhuah an siamah, kum 2023 May thlaa hnam leh hnam inkara buaina chhuah ṭan aṭanga relief camp-a awm zat an tlahniam zel tih an sawi. Bishnupur deputy commissioner Pooja Elangbam chuan district-ah relief camp 41 a awm a, IDP 7,892 an awm a, an zinga mi 2,194 chu sawn chhuah an ni tawh a ni, a ti. District-ah hian IDP hi mi 10,092 vel an awm ṭhin a, mi 257 chu Leimaram Waroiching-ah an kir leh tawh a, mi dang 389 chu Phougakchao Ikhai leh Haotak-ah an kir leh tawh bawk.

Relief camp aṭanga sawn chhuah chhungkuate chu in sakna tur direct benefit transfer hmanga pek an ni a, self-help group member-te tan sum lama ṭanpuina leh zirlaite scholarship pek an ni bawk. State Home Department chuan Bishnupur-a relief camp-a cheng mi 151 an thih tawh thu leh, hriselna lama harsatna nei an awm tih a tarlang. Imphal East deputy commissioner Dr Nivedita Lairenlakpam chuan relief camp chu 15 aṭangin pariatah a tlahniam tawh tih sawiin, district thuneituten IDP chhungkuate chenna in tur sak lama nasa taka hma a lak avangin an chenna lailawk chhuahsanin, an khuaah an kir leh tawh tih a sawi.

Dolaithabi khuaah chenna in 37 chu Pradhan Mantri Awas Yojana (PMAY) hnuaiah sak zawh tawh a ni a, IDP chhungkua eng emaw zat an cheng dawn a ni. Imphal East-a relief facility eng emaw zat, Akampat-a Ideal Girls’ College, Sajiwa-a complex leh Sawombung-a facility-ahte Ekou, Dolaithabi leh Keirao Bitra aṭanga IDP chhungkuate an la awm chhunzawm zel a ni.