Assam : Tuilianin ziaawm lam pan

Assam State Disaster Management Authority (ASDMA)-in thuchhuah a siam hnuhnung berah, Pathianni August 16 khan state chhunga tuilian dinhmun chuan ziaawm lam a pan chho zel a, tuilian vanga harsatna tawk pawh mi 51,000 velah a tlahniam tawh tih a tarlang. District panga- Golaghat, Sivasagar, Nagaon, Dhemaji leh Jorhat-te chuan tuilian hi an la tuar chhunzawm a, revenue circle 14 leh khaw 170 a la chim a ni.

Tuilian vanga thi puan thar an awm tawh lo a, thi tawh zat chu mi 104 an tling. Nagaon chu a tuar nasa ber district an ni a, mi 32,132 in harsatna an la tawk a, Jorhat-ah mi 7,426 leh Sivasagar-ah mi 5,676-te chuan harsatna an la tawk bawk. Inrinni liam ta thleng khan a pumpuiah mi 62,000 velin harsatna an la tawk a ni. Tuilian thlenna hmun hrang hrangah relief camp 14 siam a ni a, mi 1,731 vel an awm mek. Relief distribution centre aṭangin puihbawmna sem chhuah a ni bawk.

Thlai chinna hmun hectare 3,628.17 chu tuilian hian a chim a, ran vulh 18,474 a nghawng bawk tih ASDMA chuan a tarlang. Kawng leh infrastructure facility nasa takin a chhe bawk a, hengte hi siamṭhat leh thawmṭhat hna kalpui chhunzawm zel a ni. Chief minister Himanta Biswa Sarma chuan nimin Thawhṭanni khan tuilian hian Rs vbc 480 man hu leh chenna in 26,681 a tichhia tih a sawi. Tuilian tuar chhungkua 96,824-te chu chhawmdawlna, Rs 15,000 pek an nih thu leh, sorkarin PMAY scheme hmangin chenna in chhiate a sak ṭhatsak dawn tih a sawi.