Tripura : CM-in International Cricket Stadium sak tlawh

Tripura chief minister Manik Saha chuan Pathianni, August 16 khan Tripura-a International Cricket Stadium hmasa ber tur Narsingarh-a sak mek chu a tlawh a, thuneitute leh contractor-te chu hna la awmte a rang thei ang bera zo fel turin a hriattir.

CM Saha chuan helai hmuna international level cricket match buatsaih theih dan tur chungchangah Board of Control for Cricket in India (BCCI) nen inbiakna an neih tawh thu leh, nakkumah he stadium tharah hian international cricket match a thlen theih a beisei thu a sawi. Chief Minister chuan project hi chhan hrang hrang avangin vawi eng emaw zat tihkhawtlai a nih thu a sawiin sak zawh thuai a nih theihna turin contractor-te a sawipui tawh thu a tarlang bawk.

Project thawktu agency-te chuan hna lian tham thawh tur la awmte chu thla khat hnu velah zawh fel an beisei thu an sawi a, hna dang thawh tur la awmte pawh thla hnih hnuah an peihfel an rin thu an sawi bawk. CM chuan agency-te chu a rang lama thawk tur leh, cricket ngainatu ṭhalaite leh infiamna lama tuiten an chhawr ṭangkai thuai a pawimawh tih a sawi bawk. Stadium-ah hian mi 22,000 vel ṭhut theihna siam a ni dawn a ni.