Congress MP-in Assam NRC kalpui dan sawisel

Union minister hlui leh Congress MP Jairam Ramesh chuan Tripura a tlawhnaah, Assam-a Na­tional Register of Citizens (NRC) kalpui dan chu sawiselin, Assam mipuite tan harsatna lian tak a thlen a ni, a ti. 

Agartala-a Tripura Pra­desh Congress Com­mi­ttee hruaitute nena NRC chung­­chang an sawiho hnua chanchinthar lakhawmtute a kawmnaah,Ramesh chuan, "NRC final list tih­chhuah a nih hnuah, Assam mi, an document lo vawngṭha tawk lote chuan harsatna nasa tak an tawk zui a ni," a ti. List-a tello te chuan an awm zel dan turah sorkar lam aṭangin eng thupek mah an la dawng lo tih a sawi. 

Jairam Ramesh chuan, "Kaihhruaina danah chuan, list-a tello te chuan official letter an dawn aṭanga ni 120 chhungin a buaipuitu thuneitute hnenah an appeal phalsak an ni. Mahse hei hi tun thlengin kalpui a ni lo a, mipuite a ti chiai a ni," a ti. 

Central-a rorellai, BJP in NRC hi ram pumah kalpui an duh thu an sawi chungchang pawh chhang letin, Ramesh chuan kalpui a nih hmain zirchian phawt a ngai tih a sawi. Assam-a NRC kalpui a nih dan chu union home mi­nister Amit Shah-an so­ciety ṭhendarh a tumna lan­tirna a ni, tiin a sawi. 

Citizenship Amendment Bill pawh Congress chuan a tawp thlengin a dodal zel dawn tih a sawi bawk. Union minister hlui chuan he bill hi Article 14 leh 23 kalh a ni tiin, "Bill hi pass luih a nih chuan, hmar­chhak state hrang hrangah nghawng ṭha lo tak a awm ngei dawn a ni," a ti.