Union Minister-in Arunachal-ah China sipai an lut nia sawi a hnawl

Union minister Kiren Rijiju chuan Nilaini khan, China sipaiten Arunachal Pradesh huam chhung kilometre 60 an luhchilh nia sawi chu a hnawl a, mahse ramriah China sipai hmuh tur an pun chhoh zel thu sawiin, hemi chungchanga khaw mipuiten an ngaihdan an sawi chu thudik a nih thu leh, ngaih pawimawh a ṭul thu a sawi.

Rijiju chuan India leh China ramri hmun ṭhenkhatah ramri daidanna siam a nih loh avangin buaina a chhuak fo tih a sawi. China mite chuan khua an lak loh thu leh, hmun ṭhenkhatah ramri daidanna a awm loh avangin China mite hian lak an tum ve reng tih a sawi bawk. Eptu pawl Peopleâs Party of Arunachal (PPA)-in fact-finding team an din chuan kumin July thlaa helai hmun an tlawh hnuah, Chinese Peopleâs Liberation Army (PLA) sipaite chuan India sipaite chu Shera 5 patrolling point-a luh phalsak an nih loh thu leh, tualchhung mite veivahna hmun neitu nihna huang an zauh a ni.

Indian sipaite chuan June thlaa China miten Arunachal Pradesh-a camp-te an luhchilh nia sawi chu thudik lo a nih thu an sawi. Chief minister Pema Khandu pawhin August 8-a China mi state-ah an lut nia sawi chu thu belhchian dawl lo a nih thu a lo sawi tawh a, India sipaiten khauh takin an ram chin an venghim tih a sawi. Hemi chungchangah hian Rijiju chuan venhimna pawh tihchak a nih thu sawiin, mahse ramriah hian China sipai chet velna a pung tih erawh a sawi.