Meghalaya-ah Cherry Blossom Festival hmang dawn
Meghalaya chuan November 13-16 chhung hian India International Cherry Blossom Festival vawi lina a buatsaih leh dawn.
Kumina festival buatsaihna turah hian Meghalaya chuan South Korea a thawhpui dawn. Ni li festival neih chhung hian Korean event hrang hrang pawh telh a ni dawn a, K-pop concert, Korean taekwondo, Korean cuisine leh art stall te a awm dawn a, hei bakah hian Korean Cultural Centre India nena thawkdunin South Korea-ah lehkha zir theih dan remchangte pawh buatsaih tel a ni ang.
Cherry Blossom Festival hi Meghalaya sorkar, Institute of Bioresources and Sustainable Development (IBSD) leh Indian Council for Cultural Relations (ICCR) ten an buatsaih a ni. Festival-ah hian hmarchhak state hrang hrang lam entir a ni dawn a, hei bakah hian rock concert, traditional folk music, unplugged western music, choir perfomance, bicycle rally, storytelling session te neih a ni dawn bawk.
Chief minister Conrad Sangma-an festival hi a hawng dawn a, India-a South Korea ambassador Shin Bong-Kil pawhin a hmanpui dawn a ni. Festival chhung hian Meghalaya leh South Korea hian thawkdun tura inremna eng emaw zat an ziah rin a ni bawk.
November 2-3 khan Orchid Lake Resort, Umiam-a Water Sports Complex-ah Meghalaya Tourism Department buatsaihin Shillong Autumn Festival neih a lo ni tawh bawk a ni.