Meghalaya leh Assam CM-ten thawh dun remti

Meghalaya chief minister Conrad K Sangma chuan Ningani khan, Assam chief minister Himanta Biswa Sarma nen tun hnaia Shillong-a zirlaiten rally an neihnaah Assam aṭanga lutte beih an nih chungchangah inbiakna an nei a, buaina chhuak dinhmun tiziaawm turin thawh dunna ṭha siam an remtih thu a tarlang.

Buaina hi Khasi Students' Union (KSU) ten Nilainia Shillong-a rally an buatsaiha thleng a ni a, mi eng emaw zatin an hliam bakah lirtheite tihchhiat a ni.

CM Sangma chuan August 19-a Shillong-a buaina chhuak chuan state pahnih aṭanga mipui veivakte leh state tlawh tute a nghawng tih a sawi a,buaina chingfel tur hian state pahnihte chuan hmalak an remtih thu leh, cabinet minister-te pawhin remna leh muanna bakah inrintawnna a awm theihna turin inbiakna an nei dawn tih a sawi bawk.

Sangma chuan state pahniha mipuite chu buaina siam loa remna leh muanna a awm theihna atan inlungrualna vawngnung turin a chah. Meghalaya leh Assam chuan inzawmna thuk tak an neih theih thu leh, chu inzawmna venghim tur chuan thawh hona ṭha neih a pawimawh tih a sawi. Assam CM Himanta pawhin Assam leh Meghalaya chu 'sister states' an nih thu sawiin, Shillong-a buaina chhuak chu a ngaihven hle tih a sawi.

Sarma chuan Meghalaya CM nen inbiakna an neih thu leh, Assam lirtheite beih an nih chungchang pawh an sawi dun tih a tarlang. Border protection minister, Atul Bora pawhin Meghalaya-a thuneitute nen state pahnihah inremna a awm theihna turin thawh hona ṭha tak an nei tih a sawi bawk.