Assam lirtheite Meghalaya aṭangin an kir

Assam lirthei Shillong lam pana tlante chu nimin, Pathianni khan Barapani aṭangin Assam-ah an let leh. He thil hi state pahnihten Assam leh Meghalaya inkalpawhna siamṭhatna leh, khualzinte bakah lirthei himna tura hmalakna kawnga inremna an siam aṭanga ni khat hnua thleng a ni. Meghalaya drivers’ association member-te chu Barapani-a Assam lirthei tih dinnaah hian an inhnamhnawih nia sawi a ni a, nimin Pathianni khan state hmun eng emaw zatah nawrh huaihawt a ni bawk.

He thil hi Assam chief minister, Himanta Biswa Sarma-a'n Guwahati-a state pahnih aiawhten August 19-a Shillong-a buaina a chhuah hnua boruak siamṭha tura inbiakna an neih hnua thleng a ni. Guwahati-a Koinadhara State Guest House-a meeting neihah hian state pahnih official-te an tel a, Assam minister Atul Bora leh, Meghalaya deputy chief minister Sniawbha Dhar-ten an kaihruai a, state pahnihte chuan khualzin, passenger leh lirtheite him taka an tlan theihna turin inremna an siam a ni.

Dhar chuan he thil chungchangah hian FIR 15 theh luh a nih thu leh, inhnamhnawihte zawn chhuah an ni dawn tih a sawi. Bora chuan Shillong-a buaina chhuak kaihhnawihah hian KSU hruaitute zingah an president leh secretary man an ni tih a sawi a, Assam lirthei suasamtute zinga mi panga hriat chhuah an ni tawh tih a sawi. State pahnihte hian inter-state ramria buaina chhuak ṭhinte tihtawpna atan ruahmanna siam an remti a, administrative official-, police-te leh tualchhung aiawhte telna tur committee din a ni ang.