Nagaland : Sorkar enkawl sikul tam zawk khar dawn

Nagaland-a School Education department chuan sorkar enkawl sikul tam zawk a khar dawn a, state pumah amalgamation exercise chhunzawm a ni dawn tih Inrinni khan School Education leh SCERT advisor Dr. Kekhrielhoulie Yhome chuan a puang. He thu hi Nagaland Government Higher Secondary School Employees Association (NGHSSEA), Rüzhükhrie Government Higher Secondary School, Kohima-a 'Catalyzing Educational Transformation' tih thupui hmanga general conference neihah a sawi a ni.

Dr. Kekhrielhoulie Yhome chuan kumin chhungin sikul eng emaw zat khar leh zawmkhawm tum an nih bakah, higher secondary school-te chu composite school-ah thlak a ni dawn tih a sawi. Sorkar higher secondary school 57 zinga 21 chu composite a ni a, tun hnaiah composite school-a thlak turin hma lak ṭan a ni,a ti. Nikum khan stream pathum-a inziak lutte chu 6,475 an nih thu leh, kuminah zirlai inziak lut 81-in a tlahniam tih a sawi.

Postgraduate zirtirtu (PGT) leh cadre dangte dinhmun chungchang tarlangin, Personnel and Administrative Reforms (P&AR) department-in thupek a dawn avangin district parukah District Education Officer (DEO) ruat theih a nih loh thu a sawi. Tun hnaia P&AR-in office memorandum a tihchhuah tarlangin, hun lo awm turah secondary leh elementary group-te tan director neih a harsat tur thu a sawi. Director hna chelhtu tur an awm loh thu leh, tun dihmunah administrative post 46 chu hnawh khah lohin a awm tih a sawi bawk.