Manipur : CM-in parking facility thar hawng

Manipur chief minister Yumnam Khemchand Singh chuan Inrinni, August 22 khan state khawpui Imphal-a mechanised rotary parking facility chu Chunkhang Leirak luhka bula Nagamapal-ah a hawng. He parking facility hian Imphal-a market huam chhunga lirthei dahna hmun indaih lohna a sukiang thei dawn a ni.

Hawnna inkhawma thu a sawiah, CM Singh chuan state chhunga hmasawnna chu remna leh muanna nena inzawm tlat a nih thu leh, hmasawnna atana boruak ṭha siam turin inbiakna neih a ṭul thu a sawi. Khawtlang leh hmasawnna kawnga harsatna awmte sutkian kawngah hmalakna ṭha tak neih a pawimawh thu a sawi bawk. Parking facility chu mumal taka kalpui a nih theihna turin tualchhung mite leh, bazar community-ten thawh hona ṭha tak an neih a ngai dawn a ni, a ti.

Thangmeiband MLA Khumukcham JoyKisan Singh chuan tualchhung mite leh, khualzinten market huam chhungah lirthei dahna an indaih loh avangin harsatna an tawk tih sawiin, he thil sutkianna atan hian sorkar chuan nasa takin hma a la tih a sawi. Bus service chhunzawm a ni leh ta pawh lawmawm a tih thu sawiin, Thangmeiband biala tui supply-a harsatna an tawh pawh tun aṭanga rei loteah Chief Minister kaihhruainain hmalak a ni dawn tih a tarlang.

Manipur chief secretary Dr Puneet Kumal Goel pawhin parking facility thar hawn chu Imphal tana mellung ropui tak a nih thu leh, lirthei an pun zel avanga parking lama harsatna an tawh ṭhinte a titawp thei dawn tih a sawi. Hawnna inkhawmah hian Smart City CEO Thingbaijam Harikumar Singh, bazaar community member-te leh sorkar staff leh tualchhung mipuite an tel a ni.