Tripura : Agartala hmun ṭhenkhatah tuilian thleng

Tripura khawpui Agartala hmun ṭhenkhatah tui a lian a, Haora lui kama cheng mi 1,000 chuang chuan tuilian vangin harsatna an tawk mek. West Tripura district-a Sadar leh Jirania subdivision hnuaia hmun eng emaw zatah tuilian hian harsatna thlenin, Haora lui leh Katakhal Canal kama chengte chu a tuar nasa ber zingah an tel. Tuilian hian chenna in eng emaw zat a chim bawk a ni.

Thuneitute chuan chhan chhuah leh puihbawm hna thawh nghal a nih thu sawiin, lawng pali hmangin mipui harsatna tawkte chhan chhuah an ni. Chhan chhuah hna thawktute zingah Tripura State Rifle, Tripura police-te leh a kaihhnawih department eng emaw zat an tel. Chief minister Manik Saha chuan tuilian dinhmun chu thlithlai rehg a nih thu leh, District Magistrate-te leh Sub-Divisional Magistrate-te chu a ṭul anga hma la tura hriattir an nih thu a sawi.

West Tripura district magistrate, Vishal Kumar chuan Inrinnia tlang dunga ruahsur nasa chuan tuilian a thlen thu leh, tualchhung hmun eng emaw zatah harsatna an tawk tih a sawi. Tuilian tuar zingah hian Baldakhal, Chandrapur, Srilanka Basti, Aralia leh Indranagar-te an tel. Ruahsurin ziaawm lam a pan avangin chhan chhuah hna pawh tluang taka thawh a nih thu a sawi a ni. Tuilian tuarte awm lailawkna tur relief camp paruk siam niin, tualchhung mi ṭhenkhat chu hmun himah sawn an ni tih Kumar chuan a sawi bawk.