Assam ramria buaina chhuakin Meghalaya tourism sector a nghawng : Minister

Meghalaya tourism minister Timothy D Shira chuan nimin Nilaini khan, tun hnaia Assam leh Meghalaya inkarah buaina a chhuah avangin state tourism sector-ah 100% dawn hloh a ni tawh tih sawiin, he thil hi khualzin state tlawhtu zat tlahniam leh lirthei tlan khap a nih vang a nih thu a sawi. He buaina hian hotel, homestay leh tourism kaihhnawih sumdawnna dangte a nghawng a ni, a ti.

Meghalaya Assembly session ni hnihnaa thu a sawiah, Shira chuan state pahnih inkara buaina avang hian khualzin an tlakhniam thu a sawi. Kawng dan leh lirthei veivakin buaina an tawh avangin, tourism kaihhnawih sumdawnna nasa takin a nghawng tih a sawi a ni. Minister chuan Assam leh Meghalaya Chief Minister-ten inbiakna an neih hnuah buaina hi chinfel a nih tawh thu leh, state pahnih inkara lirthei tlan khapna siam a ṭul tawh lo tih a sawi.

Shira chuan Meghalaya sorkarin Assam lirthei tihchhiatte siamṭhatna tur a pe dawn tih sawiin, ṭhenawm state nena inremna ngelnghet siam a pawimawh tih a sawi bawk. Assam taxi driver-te leh lirthei dang khalhtute pawh ahma angin zalen takin Meghalaya an lut thei tawh tih a sawi a, Meghalaya lirtheite pawh Assam-ah zalen taka tlan luh phalsak turin a ngen bawk. Minister chuan state pahnih hruaituten inremna tura inbiakna an neih laia shutdown leh, kawng dan kalpui chhunzawm a nih chuan buaina nasa zawk a thlen thei tih a sawi bawk.