Assam : Tuilian vanga thi mi 107 tling tawh

Assam-ah tuilian nasa tak a thlen chhunzawm zel a, Disaster Reporting and Information Management System (DRIMS) report hnuhnung berah, district 10, revenue circle 28 leh khaw 456 chuan tuilian an tuar chhunzawm zel tih tarlan a ni. Tuilian vanga thi mi 107 an tling tawh a, state hmun hrang hrangah mi 1,37,590 velin harsatna an la tawk mek. Tuilian hian thlai chinna hmun hectare 11,933.46 a chim tawh bawk a ni.

Tuilian vanga harsatna tawk zingah Golaghat, Sivasagar, Hojai, Darrang, Lakhimpur, Jorhat, Karbi Anglong, Charaideo, Nagaon leh Biswanath district-te an tel. Golaghat chu a tuar nasa ber niin, mi 68,239 in harsatna an tawk mek a, Sivasagar-ah mi 39,495 leh Jorhat-ah mi 16,259-ten harsatna an tawk bawk. Central Water Commission chuan Dhansiri lui chuan hlauhawm chhinchhiahna a pel tawh tih an tarlang. Kushiyara lui pawhin hlauhawm chhinchhiahna a pel tawh a, mahse tuilian thlen thei tun dinhmunah an awm lo thung.

Tuilian hian chenna in tam tak a tihchhiat avangin relief camp-ah mi eng emaw zat an awm bawk. Tun dinhmunah relief camp 52 leh distribution centre 73 a awm mek a ni. Relief camp-ah hian mi 8,000 vel an awm mek a, chung zingah chuan mipa 3,592, hmeichhia 2,437 leh naupang 919-te an tel. Sivasagar chu district tuar nasa ber a ni chhunzawm zel a, mi 39,495 in harsatna an tawh bakah, loneihna hmun hectare 2,277 chu tuilian hian a chim a ni. District-ah hian relief camp 19 awmin, mi 4,649 an awm mek a ni. Tuilian thlenna hmunah chhan chhuah leh puihbawm hna thawh chhunzawm zel a ni a, thuneitute chuan medical team 59 leh, lawng 10 a tir chhuak tawh a ni.