Nagaland : Single-window portal tlangzarh dawn

Nagaland police-te chuan tun aṭanga ni 10-12 chhungin single-window online complaint portal an tlangzarh dawn. He portal-ah hian mipuite chuan harsatna an tawhte an complaint thei dawn a, an thubuai theh luh dinhmun leh police-ten chhuizuina an neihdan an hre thei dawn tih police director general, Rupin Sharma chuan a sawi.

He thu hi state khawpui Kohima-a hmeichhia leh naupangte chunga hleilenna leh, tihduhdahna thleng ṭhin chungchanga state-level convergence meeting-ah Sharma chuan a sawi. He portal system-ah hian mipuite chuan complaint an neihte chu an theh lut thei dawn a ni. System hnuaiah hian complaint tinte chu police station-a officer-in-charge te kutah hlan a ni dawn a, chhuizuina nei turin investigating officer kutah hlan chhawn leh a ni ang. Officer chuan complaint chu chhuizui ṭul a nih leh nih loh a endik leh dawn a ni.

Complaint theh luh chu chhuizui tlak a nih chuan police station chuan FIR an ziak lut dawn a ni. Thubuai ṭhenkhat police-in an chinfel theih lohte chu complaint theh luttute chuan magistrate-ah an thlen a ngai dawn thung a ni. He portal system hi police station-a DGP level, senior police officer-te pawhin an enkawl dawn bawk. DGP chuan portal chu inchhungkhura tihduhdahna tawk, naupang tihduhdah, mi enthlak (stalking) leh tihduhdah tuarte tan a ṭangkai dawn tih a sawi.