Manipur : Churachandpur DC-in dengue, HFMD leh typhoid dinhmun thlirlet

Manipur-a Churan­chandpur deputy commissioner, Krishna Kumar chuan August 25 khan senior health official-te emergency meeting a neihpuia, he hunah hian district-a natna hrang hrang; dengue, typhoid leh hrileng laka invenna tura ruahmanna awmte sawi ho niin, Hand, Foot and Mouth Disease (HFMD) kai thar an pung zel chungchang an sawi ho bawk.

Meeting hi Tuibong-a Mini Secretariat-ah neih a ni a, hriselna lama mi pawimawh eng emaw zat an tel a ni. Deputy Commissioner chuan Chief Medical Officer leh Zonal Education Officer-te chu khua, sikul leh college-ahte awareness campaign nei turin a hriattir a, natna hrang hrang darh zel tur venna tichak turin a ti bawk. Department kaihhnawihte chu thosi pian theihna hmun tichhe tura tih an ni.

Meeting-ah hian naupang zinga Hand, Foot and Mouth Disease natna kai an pung chho zel chungchang pawh sawi ho a ni. Health official-te chuan he natna lan chhuah dan chu khawsik bakah vun vual leh thak aṭangin a ni tih an sawi. CMO chuan meeting-ah hian he natna vei an enkawldan tarlangin, tun thlengin thihpui an la awm lo tih a sawi. Official-te chuan typhoid natna vei tam chho zel pawh tarlangin, mahse uluk taka thlithlai niin healthcare system awmsa hmangin harsatna awm loa natna veite enkawl an nih thu an sawi bawk.