Assam : AASU-in lungawi lohna lantir

Assam-a Tinsukia district-a All Assam Students' Union (AASU) chuan, Tinkusia khuaah nimin Ningani khan nitin mamawh man sang chho zel duh loh lantirna atan lungawi lohna an lantir a, he thil hi tihtawpna tura a rang lama hma la turin sorkar an ngen bawk. He lungawi lohna lantirna hi AASU-chuan state pumah buatsaihin, August 27 hian district headquarters-ah ei leh in leh thil pawimawh dangte man sang zel duh lohna lantirna atan kawngzawh a ni dawn tih an lo puang tawh a ni.

Kawng hi College Road-a AASU office bul aṭanga zawh ṭan a ni a, Thana Chariali an pan a ni. Zirlai activist-te chuan nitin mamawh thil pawimawh man sang chho zel chu an dodal thu sawiin, mipui tan hahdamna pek an phut bawk. August 26-a thuchhuah an siamah, AASU president Utpal Sarma leh general secretary Samiran Phukan-te chuan ei leh in leh thil pawimawh man tihsan a nih fo avangin mipui khawsak a ti harsa zual hle niin an sawi.

Zirlai pawl chuan sorkarin thil man sang zel chu a thunun thei lo niin an sawi a, mipui tan phurrit nasa tak a thlen a ni, an ti. AASU chuan thil man sang lutuk chuan chhungkaw budget-ah harsatna a thlen tih sawiin, sorkar chu thil man tihhniam a nih theihna tura a rang lama hma la turin an ngen a ni. An pawl chuan sorkar chu he an harsatna hi ngaihsak tur leh, mipui chhawmdawlna pek an nih loh chuan lungawi lohna lantir chhunzawm zel an tum tih an sawi a ni.