Nagaland : Codeine cough syrup bottle 19,760 man

Nagaland-a Dimapur police-te chuan Marwari Patti-a Jain Temple Road-a warehouse an dapnaah, codeine cough syrup bottle 19,760 an man tih official-ten an sawi. Police-te chuan damdawi siamna hmanrua dahkhawmna chungchanga an thudawn an bawhzuinaah heng khuh damdawite hi an man a ni. Suburban police station team-te chuan he warehouse neitu biak an tumna an hlawhchham avangin warehouse hi an dap ta a ni.

He warehouse dapna hi ACP (West) kaihruainaa kalpui a ni a, independent witness eng emaw zat an awm bawk. Police-te chuan he an dapna hi e-Sakshya platform hmangin digital-a record a nih thu an sawi. Beihpui an thlaknaah hian officer-te chuan carton 126 hmu chhuakin, heng zinga carton 101-ah hian Bescod Cough Syrup bottle 16,160 an hmu chhuak a, carton 25-ah EB-DYL Cough Syrup bottle 3,600 an hmu chhuak bawk.

Police-te chuan damdawi siamna hmanrua dang eng emaw zat an hmuh chhuah thu leh, chungte chu enfiah a nih tur thu an sawi. Narcotic Drugs and Psychotropic Substances (NDPS) Act hnuaiah suo motu case ziah luh a ni. Tun dinhmunah warehouse enkawltute hriatchhuah leh, supply leh distribution network nia rinhlelhte zawn chhuah tuma chhuizuina neih mek a ni.