Meghalaya: ST zirlaite tan scholarship Rs vbc 93.7 pe chhuak dawn

Meghalaya chief minister Conrad K. Sangma chuan academic year 2025-26 atan, Scheduled Tribe zirlai 96,812 te chu post-matric scholarship first instalment Rs vbc 93.7 a pe chhuak dawn. Scholarship hi direct benefit transfer (DBT) system hmangin zirlaite bank account-ah transfer a ni dawn a ni.

Umbrella Post-Matric Scholarship scheme hnuaia ST zirlaite tana kumin chhunga sum hman tura ruahman chu Rs vbc 198.42 a ni. Sorkar laipui sum aṭangin Rs vbc 84.55 hman a ni a, state sorkar chuan Rs vbc 9.4 a sanction bawk. Shillong College-a programme buatsaiha thu a sawiah, Sangma chuan scholarship chu tuition fee, hostel senso, lehkhabu leh zirna senso dangte a phuhru thei dawn tih a sawi.

CM Sangma chuan kuminah sorkar laipuiin scholarship fund real-time-a transfer theihna tur, Single Nodal Agency system a hman avangin scholarship chu pek chhuah tlai a nih thu a sawi. He system thar hnuaiah hian state-in verification leh tih tur pawimawh dang a tih zawhah, Reserve Bank of India chuan zirlaite hnenah direct-in pawisa a transfer ṭhin a ni. Sangma chuan zirlaite chu ni li aṭanga ni nga chhungin an account-ah a luh beisei a nih thu a sawi. Education Department chu bank account dik lo, Aadhaar lama harsatna leh thil dang inmil lo avanga scholarship dawng thei lo an awm lohna tura uluk taka vil turin a hriattir bawk a ni.