India tana Tawang latu hriatrengna siam dawn

Arunachal Pradesh sorkar chuan India rorelna hnuaia Tawang dahtu, major Ralengnao Khathing chu hnehna a chan aṭanga kum 70 hnuah a hriatrengna siam a tum. 

Memorial siamna tur hmun hi Tawang district thuneituten an thlang dawn a, he hmunah hian Khathing chanchin bakah, Monpa tribe chanchinte pho lan a ni ang. Major Ralengnao Khathing hriatrengna siamna tur lungphum hi February 14 hian phum a ni ang. He ni hi kum 1951-a Khating-a'n India tana Tawang a lak ni, McMohan Line bula India hnam puanzar a zarna ni nia sawi a ni. 

Khathing hi Bob tia hriat lar zawk a ni a, India ram hmun tam zawk leh Arunachal Pradesh hmun ṭhenkhatah pawh hriat zui a hlawh lutuk lo. Mahse Tawang mipuite chuan an la ngaihlu leh a, China ral a rawn len chho hnuah Tawang bial chu India kuta a awm theihna tura a hnathawh avangin an la zah reng a ni. 

Chief minister Pema Khandu chuan Maj Khathing leh Arunachal Pradesh tana a hnathawh ropui tak chu mi tam takin an hre tawh lo tih a sawi a, mahse a hriatrengna hmun siam a nih hnuah, mi tam takin he hmun hi tlawhin a hnathawhte an hrechiang thei dawn a ni, a ti.