Manipur : CM-in pawl hrang hrangte nawrh huaihawt lo turin ngen

Manipur chief minister Yumnam Khemchand Singh chuan, state chhunga National Register of Citizens (NRC) kalpui phutna chu a thlawp rualin, NRC update hmaa Census kalpui chungchanga nawrh huaihawt bakah, bandh leh kawng dang hmanga nawrh huaihawt lo turin pawl hrang hrangte a ngen.

He ngenna hi Campaign for Just and Fair Delimitation (JFD)-in Census kalpui a nih hmaa NRC update sorkar laipuiin a kalpui loh chuan, vawiin August 31 zanlai aṭangin darkar 24 chhung bandh huaihawt a nih tur thu an puan hnuah a siam a ni. Nimin Pathiannia New Delhi a pan hmaa Directorate of Information and Public Relations a kawmnaah, CM Khemchand chuan state leh sorkar laipuiin mipui harsatna sutkian an tum thu leh, nawrh huaihawt chuan buaina nasa zawk a thlen thei dawn tih a sawi.

Chief Minister chuan tun hnaia New Delhi-a civil society organisation 14 leh MLA palaiten campaign an neihah, sorkar laipui aṭangin chanchin lawmawm an dawng tih a sawi. Heng pawlte hian Census neih hmaa NRC update dan tur an ngaihtuah a ni. State sorkar chuan NRC kalpui hmasak chu a thlawp thu a lo sawi tawh bawk. CM Khemchand chuan sorkar laipui nen inbiakna an neih tawh thu leh, state home minister Govindas Konthoujam chuan NRC update chu kalpui thuai a nih tur thu a sawi a ni.

CM Khemchand chuan nawrh huaihawt chuan nitina eizawng, hmeichhe thlai zuarte leh zirlaite nasa takin a nghawng tih sawiin, pawl hrang hrangte chu an thil phut tihhlawhtlinna tura nawrh huaihawt lo tura ngenin, dan leh thupek zawm lote chu hrem an ni dawn tih a sawi. Chief Minister hian hemi chungchang bakah, state chhung buaina sorkar laipui hruaitute sawipui turin New Delhi a pan a ni.