Meghalaya : Netaji Subhas Chandra Bose lim siamṭhatna tur Rs nuai 5 sanction

Meghalaya chief minister Conrad K. Sangma chuan August 29 khan Rynjah-a R.R. Colony tlawhin, tun hnaia Khasi Students’ Union (KSU)-in nawrh an huaihawtnaa zalenna sualtu, Netaji Subhas Chandra Bose-a lim tihchhiat a nih chungchangah tualchhung non-tribal community member-te a kawm. Sangma chuan lim tihchhiat chu a hmunah enfiahin, KSU black-flag motorcycle rally neihnaah Shillong-a hmun eng emaw zata buaina chhuak leh, thil tihchhiat a nih thu report a nih avanga mipui lungawi lohna chungchang a sawipui a ni.

Chief Minister chuan mipuite chu lim tihchhiat siamṭhatna atan Rs nuai 5 pek a tiam a, state sorkar chu thil tihchhiat bakah Shillong leh Meghalaya-a inremna leh inpumkhatna tichhe thei thil eng pawh dodal kawngah nghet takin a ding tih a sawi a ni. He lim pawh hi KSU rally neihnaa tihchhiat a ni a, zirlai pawlin an thil phut nawrna atana an buatsaihah hian khawpui chhung hmun ṭhenkhatah buaina leh thil tihchhiatna a thleng a ni. State sorkar chuan thil thlenga mawhphurtute chu dan anga hrem an ni dawn tih a tarlang.

Netaji Subhas Chandra Bose hian Shillong chanchin nena inzawmna pawimawh tak a nei a ni. Kum 1927 khan a vawi khatna atan Shillong hi tlawhin, hemi hnu kum 1938 khan Indian National Congress president hna chelh turin a kir leh bawk. R.R. Colony-a lim hi kum 2023 January 23 khan a piancham hriatrengna puala dah a ni.