Council Election : Assam-ah BJP, Meghalaya-ah Congress-te an chak

19th December, 2016

Bharatiya Janata Party (BJP) chuan Assam-a Deori leh Thengal Kachari Autonomous Council inthlanah te hnehna an chang a, hetih lai hian Congress chuan Meghalaya-a Khasi Hills Autonomous District Council leh Jaintia Hills Autonomous District Council-ah hnenah an chang ve thung.

Assam-ah chuan Council pahniha seat awm zawng zawng 39 aṭangin BJP chuan seat 20 lain, hnehna an chang a ni. Seat 17 awmna Deori Autonomous Council-ah BJP chuan seat 7 lain, Congress (2), Asom Gana Parishad (AGP) (1) an la a, independent candidate-te'n seat sarih an chang ve bawk. Thengal Kachari Autonomous Council-ah seat 22 awmin, heng zinga 13 te chu BJP-in an hui a, Congress (4), AGP (3) ten an dawt a, independent candidate pahnih thlan tlin an ni. Deori leh Thengal Kachari Autonomous Council inthlan hi December 15 khan neih niin, Inrinni khan vote chhiar a nih thu Assam State Election Commission chuan a tarlang.

Meghalaya-ah chuan rorel lai Congress party chuan tribal autonomous district council pahniha inthlanna neih zawh takah hnehna a chang.

Congress hian Khasi Hills Autono-mous District Council leh Jaintia Hills Autonomous District Council-ah te hian seat khat ve vein hnehna an chang. Hetih lai hian Hills State Peoples Democratic Party (HSPDP) leh United Democratic Party (UDP)-te chuan KHADC-ah seat hnih ve ve an la a, beisei angin BJP an che ṭha lo thung. NCP hruaitu Ricky Shullai leh deputy speaker hlui Sanbor Shullai-te chu Laban-Mawprem constituency aṭanga thlan tlin an ni. HSPDP chuan Nongspung-Sohiong leh Pariong-Mawthadraishan-ah te hnehna an chang ve bawk. Opposition party UDP chuan seat awm zawng zawng chuh mah se, Nongkrem leh Mairang-Nongkhlaw constituency-ah te chauh seat an la a ni.

Jaintia Hills Autonomous District Council leh Khasi Hills Autono-mous District Council-a MLA pariat zinga pasarihte an ban avangin bye-election hi neih a ni. Meghalaya-ah hian Prevention of Disqualification (Members of Legislative Assembly of Meghalaya) (Amendment) Act, 2015 hman a ni a, MLA-te chu nihna chelhkawp khapsak an ni.