Manipur sorkar-in Internet service tihtawp lailawk

Manipur cabinet meeting chuan dan leh thupek khauh zawka kenkawh a nih theih nan internet service tih tawp lailawk a remti.

Chief Minister O Ibobi Singh-a kaihhruaina hnuaiah Inrinni khan cabinet meeeting neih a ni a, dan leh thu pek khauh zawka kalpui a nih theihna turin internet servicr tihtawp lailawk an remti ta a ni. Social media - Whatsapp, Facebook, SMS leh a dangte hmangin nasa taka thu thehdarh a nih ṭhin avangin cabinet chuan thutlukna a siam ta tih tarlan a ni a, District Magistrate-te chu district tinah internet service titawp tura thupek chhuah tura hriattir an ni. Cabinet meeting chuan venhimna khauh zawka kengkawh turin ruahmanna a siam a, state khawpui Imphal leh valley district-ah te venhimna khauh zawk pek an remti.

Cabinet chuan Imphal West District Magistrate hnenah Inrinni khan hriattirna pein, Imphal West District-a telecom operator zawng zawngte chu mobile data service titawp vek tura thupek chhuah turin a ti. Manipur-ah hian Uited Naga Council (UNC)-te chuan November 1 aṭangin National High-way an dangchat a, hei hian dan leh thupek kenkawh kawngah harsatna a thlen mek a ni. Court chuan dan leh thupek khauh zawka kengkawh tur leh, NH-a lirthei chet vel dan ruahman turin state sorkar a hriattir a, mahse tun thlengin tihhlawhtlin a la ni lo.

UNC-te hian tun thlengin NH an la dang chat a, harsatna ching fel turin hun a la ngai deuh dawn niin a lang. Buaina chingfel turin sorkar chuan theihtawp chhuahin hma a la reng a, pawl hrang hrangten nawrh an huaihawt ṭhin avangin dan leh thupek kenkawh a harsa zual nia tarlan a ni. Media kaltlanga thudik lo vawrh darh a hluar bakah, buaina tipunlun thei zawnga thu vawrh darh a awm ṭhin avangin cabinet meeting chuan internet service tih tawp lailawk hi a rel ta a ni.