Manipur-ah nawrh huaihawt vangin nunphung khaihlak

Manipur-a hmeichhe pawl hrang hrangte chuan kar kalta Zirtawpni zan zanlai aṭang khan, Imphal-ah darkar 24 awh nawrh an huaihawt a, nunphung a khaihlak phah nasa hle.

Nawrh huaihawttute chuan, United Naga Council (UNC)-te'n hun rei tak chhung National Highway an dangchat leh, tribal-te'n police an lambun an duh lohna lantira huaihawt an nih thu an sawi. Inlambunna thlengah hian police mi leh sa pathum an thi a, midang 14-te'n hliam an tuar a ni. Darkar 24 awh nawrh huaihawt hi Manipur khawpui Imphal bakah Moreh-ah kalpui a ni a, heng hmunah te hian lirthei che vel a buai bakah, nunphung a khaihlak nasa hle. Zirna-in zawng zawng khar a ni a, dawr leh sumdawnna hmun dangte pawh khar a ni.

Chief Minister Okram Ibobi Singh chuan, pawl hrang hrangten nawrh an huaihawt ṭhin chu a dem thu sawiin, buaina chingfel turin sorkar chuan hma a la a ni, a ti. Manipur-a buaina chhuak fo ṭhinah National Socialist Council of Nagaland - Isak-Muivah (NSCN-IM)-te chu mawhphurtu an nih thu a sawi. Nawrh huaihawttu zinga mi Pishakmacha chuan, NSCN(IM)-te chu buaina chawk chhuaktu an nih thu sawiin, police-te lambunnaah pawh an inhnamhnawih ngei a rin thu a sawi. Sorkar laipui chu NSCN(IM)-te inbiakna neihpui tur leh, buaina chinfel a nih theih nana hma la tura an phut thu a sawi.

Nawrh hi hmeichhe pawl pali - Phouoibi, Ima Laimaren Sidabi, Imoinu leh Panthoibi-te'n an buatsaih a ni a, kawng­zawhtute hian UNC-te an demna thu leh police-te lambun an nih an demna thuziakte an keng hlawm a ni.

Hetih lai hian Imphal, Ching­meirong-a Manipur Baptist Convention (MBC) Biak-In chu kar kalta Inrinni khan beih a ni.

MBC Biak-In hi tlai lam dar hnih velah beih a ni a, lung leh hmanraw dang hmangin beih a ni. Police-te chuan he lai hmun hi an pan nghal a, Biak-In gate tichhiaa luh tumte nen an innawr buai zui a ni. United Naga Council (UNC) chuan thuchhuah siamin, Manipur Baptist Convention (MBC) Cen­tre Church leh Imphal-a Tangkhul Church beih an ni chu an dem thu leh, pawikhawihtute man chhuah ngei an phut thu an sawi. State sorkar chu UNC hruaitute man bikah puhin, Biak-in suasamtute pawh man chhuak ve ngei turin an phut tih an sawi.