Nagaland : NSF-in 'Vande Mataram' dodalna atan kawng zawh

Naga Students’ Federation (NSF) chuan nimin Thawhlehni khan, official event-a 'Vande Mataram' sak duh lohna resolution siam phutin Nagaland Legislative Assembly panin kawng an zawh. He kawng zawh hi ram leh hnam sawichhiat tumna ni loin, an rinna nena inkalh a nih vang a ni tih an sawi. Kristian tamna state-a Assembly Monsoon session neih ni hmasa berah hian, lungawi lohna lantirtute chuan Naga Solidarity Park aṭangin kawng an zawh ṭan a ni.

NSF president Mteisuding chuan, zirlai pawlten Naga mipui dikna chanvo leh sakhaw rinna humhim turin theihtawp an chhuah dawn tih a sawi. 'Vande Mataram' chu an sakhuana nena inkalh a nih avangin an dodal zel dawn tih a sawi a, lungawi lohna lantirna chu ram leh hnam emaw, hnam hla emaw sawichhiat tumna a nih loh thu a sawi. Mteisuding chuan Naga mipuite chu an sakhaw rinna humhim tura penchhuak turin a sawm bawk.

Hei bakah Naga MLA-te chu an sakhaw rinna ngai pawimawh turin a ngen bawk a, politician an nih hmain Kristian an ni tawh tih a sawi. NSF president chuan state official bakah private programme-a Vande Mataram sak emaw, play emaw duh lohna resolution pass turin Assembly an phut tih a sawi. He hmalakna hi khawtlang nun humhalh tumna a nih thu a sawi bawk. Mteisuding chuan pungkhawmte hmaah, NSF-in Chief Minister leh Assembly speaker hnenah an thil phut an theh lut tawh tih sawiin, Vande Mataram sak dodalna chu pawm turin a ngen a ni. An thil phut hi pawm a nih hma chuan Assembly gate pawnah lungawi lohna an lantir chhunzawm zel dawn tih a sawi.