Arunachal : Seppa-a sumdawnna hmuna chhawr kum tling lo 9 chhan chhuak

Arunachal Pradesh-a East Kameng police-te chuan District Administration (GA), Child Welfare Committee (CWC) leh Labour Department an thawhpuinain, Thawhṭanni khan Seppa khuaa sumdawnna hmuna chhawr kum tling lo pakua an chhan chhuak. Sumdawnna hmuna kum tling lo chhawr an nih chungchanga an thudawn bawhzuiin, team-te chuan khaw chhung hmun hrang hranga dawr leh sumdawnna hmunte an enfiah a ni.

Beihpui thlakna an neihah hian, sumdawnna hmun hrang hranga kum tling lo chhawr mek pakuate hi chhanchhuakin, Child Care Institution (CCI) kutah hlan an ni a, naupang venhimna dan hnuaiah counselling-te pek an ni dawn a ni. Police-te chuan he beihpui an thlakna hi, naupang kum tling lo hnathawka chhawr ṭhin an nihna aṭanga venhimna tur a nih thu leh, zirna kawnga an dikna chanvo humhimna a nih thu an sawi.

Thuneitute chuan dawr neitute leh sumdawngte chu naupang kum tling lo chhawr lo turin an hriattir a, mipuite chu hetianga kum tling lo chhawr an awm a nih chuan report tura ngenin, child labour-free district-a siam turin thawh hona ṭha neih an phut bawk. East Kameng police-te chuan mitinte chu naupangte hmakhua ngaihtuah a, hma hun ṭha zawk an neih theihna tura hma la ṭheuh turin an sawm a ni.