Assam: IPF-in 'Dima Hasao Autonomous Council' hman dodal

Assam-a Dima Hasao district-a Indigenous Peopleâs Forum (IPF) leh pawl dang eng emaw zat chuan danin a ruat thar, 'North Cachar Hills Autonomous Council' tih 'Dima Hasao Autonomous Council' tih hming put tir chu an dodal. Nimin September 3-a press release an tihchhuahah, IPF chuan council hriattirna, resolution leh administrative order hmanga council constitution hming tihdanglam theih a ni lo tih an tarlang.

An pawl chuan he thil hi chief minister Himanta Biswa Sarma hnenah hriattirna an thlen tawh thu an sawi. IPF chuan Chief Minister-in forum-ah hian council hming hi thlak a nih loh thu leh, a hming dik tak chu N.C. Hills Autonomous Council a nih chhunzawm zel thu a lo hrilh tawh a ni. Mahse IPF chuan kumin August 31-a council Principal Secretary-in thupek a chhuah chu a lungawi thlak loh an tih thu an sawi a, he thupekah hian department hotu zawng zawngte chu council hming atan 'Dima Hasao Autonomous Council' hmang turin a hriattir a ni.

Forum chuan he thupek siam hun leh siam dan chungchangah hriat duh an neih thu leh, politics lama hamṭhatna turin leilung fate zingah inhriatthiam loh tawnna leh inṭhen darhna thlen tumna a nih theih thu an sawi. An pawl chuan he thupek August 31-a tihchhuah hi a rang lama hnukkir tur leh, an thil phut tihhlawhtlin a nih loh chuan nawrh huaihawt bakah, rel kawng leh highway service-te dan a ni dawn tih an sawi.