Meghalaya: NEC-in Rs vbc 28 project zo fel

North Eastern Council (NEC) chuan kumin July leh August thla chhung khan Rs vbc 28.08 hu hmasawnna project a zo fel tawh a, state puma hmalakna kalpuina atan hian Rs vbc 7.86 pe chhuakin; zirna, healthcare, entrepreneurship, tourism leh chenna leilung humhalh te a huam a ni.

Oroject hrang hrang zingah hian Tura Civil Hospital-a MRI machine dah, sikul sak leh tihchangtlun, entrepreneurship centre puihnate leh tourism infrastructure lama investment-te a tel. Project pawimawh thawh zawh tawh zingah, Tura Civil Hospital-ah Rs vbc 6.69 sengin 1.5 Tesla MRI machine dah a ni. He facility hian tualchhung lamah diagnostic service changtlung zawkin a pe dawn a, Garo Hills biala damlote chuan hmun dang an pan a ngai tawh dawn lo a ni.

NEC hian July 6 khan Ri-Bhoi district-a Tiwa (Lalung) community tan, Rs vbc 2.94 sengin Community Development Programme a zo fel tawh bawk a, he programme hi Ri-Bhoi Deputy Commissioner kalpui niin, project-ah hian leilung humhalh, tui humhalh leh ramngawa nungcha chi hrang hrang humhalhna tura hmalakna a ni. Zirna lam pawh ngaih pawimawh zel niin, council hian Laidiengsai, Nongkynrih, Mawrah, Pomsohmen, Laitryngew, Wahlong, Nongjri Pynursla leh Nongjri Nartiang-a Ramakrishna Mission sikul pariat building sakna atan Rs vbc 4.90 a pe chhuak bawk.