Manipur: UKNA helpawl member 2 kaphlum
Manipur-a Churachandpur district-a Indian Army leh, Assam Rifle team ṭangkawpin beihpui an thlaknaah, United Kuki National Army (UKNA) helpawl member pahnih kah hlum an ni a, midang pahnih an hliam niin official-te chuan an sawi.
Henglep subdivision hnuaia Phaibong khaw camp-a UKNA cadre-te hmuh an nih chungchanga an thudawn bawhzuiin beihpui hi an thlak a ni. Security force-te chuan camp hi endikin, September 2 zing khan uluk zawka thlithlai turin an insawn lut tih official-te chuan an sawi bawk. Assam Rifle-te chuan heng helpawlte hian zing dar 5:30 vel khan silai an hmet puak tih sawiin, team-te hian an chhanglet ve nghal a ni.
He beihpui thlaknaah hian UKNA cadre pahnih kahhlum niin, pahnihin hliam an tuar tih Inrinni zan khan social media-ah an tarlang a ni. Silaia an inkahna a tawp hnuah camp chhung hi dap a ni a; MA rifle pahnih, AK-56 rifle pakhat, lathode silai pakhat, lathod grenade pasarih, AK mu 15, AK-56 mu 371, MA rifle mu 601 leh SLR mu 172 an hmu chhuak tih official-te chuan an sawi. Security force-te chuan cambat uniform 15 leh silaimu dahna pasarih an hmu chhuak bawk.
Assam Rifle-te chuan helai chhehvel ramngawah beihpui thlak chhunzawm a nih thu an sawi. UKNA hi sorkar laipui, Manipur sorkar leh Kuki leh Zomi helpawl eng emaw zatin an ziah, Suspension of Operations (SoO) inremna ziaktu zingah an tel lo a ni.