Manipur leh Sikkim electoral roll aṭangin voter nuai 1.85 paih chhuak

Special intensive revision (SIR) kalpui mekah, Manipur electoral roll aṭangin voter 6.3% paih chhuah an ni a, Sikkim electoral roll aṭangin voter 11.2% paih chhuah an ni bawk. Final electoral roll hi September 6, Pathianni khan tihchhuah a ni.

SIR kalpui a nih hma hian Manipur-ah voter 20,93,076 an awm a, Sikkim-ah 4,71,081 an awm bawk. SIR kalpui a nih hnuah state pahnih aṭang hian voter nuai 1.85 paih chhuah an ni a, Manipur aṭangin 1,32,456 leh Sikkim aṭangin 52,614 paih chhuah an ni. Tun dinhmunah Manipur-ah hian voter 19,60,620 an awm a, Sikkim-ah 4,18,467 an awm bawk. SIR kalpui a nih hma leh kalpui a nih laiin, Manipur-a Kuki-Zo pawlte chuan an community member, kum 2023 May 3 aṭanga tualchhung buaina avanga chenna in leh lo chhuahsante electoral roll aṭanga paih chhuah an nih an hlauhthawn thu an sawi.

Manipur-ah hian hmeichhe voter 10,06,962 an awm a, mipa 9,53,350 an awm a, third-gender elector 308 an awm bawk. Chief Electoral Officer (CEO) in thuchhuah a siamah, final photo electoral roll chu Election Commission of India kaihhruaina hnuaia tihchhuah a nih thu a sawi. Kumin July 5-a electoral roll tihchhuahah, voter 19,34,399 an awm a ni. Sikkim khawpui Gangtok-a CEO office chuan final electoral roll-ah voter 4,18,467 an awm thu leh, mi 52,614 paih an nih thu an tarlang.