Meghalaya lungalhthei khura tangte thi emaw dam emawin lakchhuah an ni tur a ni : SC

Meghalaya-a East Jaintia Hills-a Ksan thingtlang khuaa lungalhthei khura tangte chu an thi emaw an dam emaw, lakchhuah an ni ngei tur a ni tiin, Supreme Court chuan thuchhuah a siam. 

Lungalhthei khurah hian December 13 aṭang khan chin hriat lohin mi 15 an tang a, tun thlengtin lakchhuah an la ni lo. An thi nge an dam tih pawh hriat a la ni lo bawk. 

He khura tangte chungchanga petition thehluh hearing neihnaah Supreme Court chuan tangte hi an damchhuak lo a nih pawhin an ruang tal pawh la chhuak turin thupek a tichhuak. SC chuan chhanchhuah hna thawh danah a lungawi zan loh thu sawiin, "Engpawh nise, an thi emaw an dam emaw lakchhuah an ni ngei tur a ni. An damchhuah ngei theih nan Pathian hnenah kan dil e" tiin thuchhuah a siam.

Khura tang miner 15-te hi ft. 320-a thuk, dan loa lungalhthei lakna hmun, “rat-hole” mine an tihah an tang a, chhanchhuah hna thawh mek zel a ni. NDRF, Navy bakah firefighter-te chuan chhanchhuah hna hi an thawk a, an tan tirh lai vel hian khurah hian tui a tam avang leh pump chhuahna khawl lian an neih loh avangin chhanchhuah hna hi thawh a harsa hle niin an tarlang.