Meghalaya: Vice President-in Rs vbc 1,010 senna tur project lungphum phum

India vice president C. P. Radhakrishnan chuan September 7 khan Meghalaya-ah Rs vbc 1,010 chuang senna tur hmasawnna project hrang hrang; tui supply, kawng inkalpawhna, healthcare leh power infrastructure bakah, sector pawimawh hrang hrang lungphum a phum. Lungphum phumna ceremony hi infrastructure lama hmalakna lian tham bulṭanna a ni a, service pawimawh tihchak leh state puma inkalpawhna tihchangtlunna tur a ni.

Project thawh tur zinga lian ber chu New Shillong Water Supply Scheme, Phase II (Part A) a ni a, Rs vbc 850.58 senna tura ruahman a ni. Vice President hian Jongksha-Kharang-Dienglieng-Nongjrong-Moodymmai-Wahiajer kawnga Umngot lui chunga metre 110-a thui lei dawhna tur lungphum a phum bawk. Project atan hian Rs vbc 21.86 vel hman a ni ang. Hei bakah Pilangku-A, Jyrmang, Chibra leh Mawiong paltlang tur, km 13.50-a thui Umsen-Barapathar kawng siamna tur lungphum phum a ni bawk a, Rs vbc 56.01 sen a ni ang.

Healthcare sector-ah Shillong-a Civil Hospital khum 30 awmna, AYUSH facility sakna tur lungphum phum a ni a, Rs vbc 10 vel ruahman a ni. Infrastructure thawh tur zingah hian Mawkhanu-a 2×50 MVA, 132/33 kV substation sak pawh a tel a, Saisiej-ah 132 kV double-circuit Saisiej–Mawkhanu line leh GIS bay pawh telin, Rs vbc 72.50 sen a ni dawn a ni. Meghalaya chief minister Conrad K. Sangma chuan Vice President chungah hian lawmthu sawiin, project-te cuan tui supply, kawng, healthcare leh infrastructure a thuam chak dawn tih a sawi.