Meghalaya: CM-in infiammi 46 chawimawina hlan

Meghalaya chief minister Conrad K. Sangma chuan September 8 khan, state chhunga infiammi 46-te chawimawina a hlan. He chawimawina hi state, ramchhung leh rampawna an hlawhtlinna lawmpuina a ni. CM Sangma chuan infiammi, coach-te leh sports association aiawhte inbiakna a neihpui bawk a, infiamna lama an career thuam chakna tura an mamawhte a sawipui a ni.

Chief Minister chuan inbiakna an neihah hian, infiammite mamawh ngaihthlak sak bakah infiamna lama hlawhtlinna nasa zawk an neih theihna tura thlawpna pek tum a nih thu a sawi. Meghalaya hi nakkuma 39th National Games thleng turin an inbuatsaih mek a ni. Sangma chuan infiammite chu state aiawha mi pawimawh tak tur an nih thu leh, national level thlenga hlawhtlinna an neih theihna tura thawhhlawk turin a chah.

Sangma chuan infiammite hlawhtlinna chu state tan rohlu leh inchhuanna tham a nih thu leh, dinhmun sang zawk thleng chhunzawm turin duhsakna a hlan bawk. Hei bakah coach-te leh sports association hrang hrangte pawimawhna sawilangin, infiammi ṭhalaite talent tihpun bakah level sang zawka an tel theihna tura puih kawnga mi pawimawh tak an nih thu a sawi bawk a ni.